سۆشیال میدیا برەو بە لادانە سێكسییەكان دەدات

هۆشداری لە پەرەسەندنی “زینای محارم” دەدرێت
رۆژنامه‌وانی، هه‌ولێر، ئارەزوو نوری حەكیم
“بەمزوانە دەست دەكەین بە پۆستەكانمان”، “چیرۆكەكانتان بنێرن با هەموو سوودی لێ وەربگرین”، “كێ چیرۆكی سێكسی هەیە لەگەڵ خوشكی و پووری بۆمان بنێرێت وەك خۆی بڵاوی دەكەینەوە”، “من كوڕێكم تەمەنم 30 ساڵە ناوم ئامانجە ئادمینی پەیجی (….) كێ دەبێتە هاوڕێم بۆتێركردنی حەزی سێكسی”… ئەمانە بەشێكن لەو پۆستانەی لە ژمارەیەك پەیجی تایبەت لە تۆڕی كۆمەڵایەتی فەیسبووك و ئینستاگرام بڵاوكراونەتەوە.

لەو پەیجانەدا وێنەی نیمچە رووتی وروژێنەری ئەستێرەكانی پۆڕن، چیرۆك و گێڕانەوەی وروژێنەر و سێكسیانە بڵاوكراونەتەوە. كە زۆربەی چیرۆكەكان ئاماژە بۆ سێكس كردن لەگەڵ (خوشك، دایك، پوور، كچی دراوسێ، دەستەخوشكی خوشك، براژن) دەكەن و بە زمانێكی سادە و داماڵراو قسە لەسەر ئەو لادانە كۆمەڵایەتییە دەكەن، كە بە رای ژمارەیەك لە پارێزەر و شارەزایانی كۆمەڵناسی و چالاكانی بواری مافەكانی ژن خەریكە دەبێتە دیاردە و حاڵەتەكان لە فۆرمی جیاوازدا لە ناوچە جیاجیاكان دووبارە دەبنەوە. ئەمە ئەو مەترسییە گەورەیەیە كە هەڕەشە لە كیانی خێزان لە كۆمەڵگەكانی رۆژهەڵاتی ناوەڕاست و لە ناویشیاندا كۆمەڵگەی كوردی دەكات.

لە مانگی ئایاری رابردوودا، ژمارەیەك لە پەرلەمانتارانی میسر لە دژی هەندێك لەو درامایانە هاتنە دەنگ، كە لە مانگی رەمەزانی ئەمساڵ پەخشكران. دیارترین ئەو درامایانەی رووبەڕووی رەخنە بوونەوە، درامای “البرنس” لە سیناریۆ و دەرهێنانی “محمد سامی” و درامای “خیانە عهد” لە نووسینی “ئەحمەد عادل” و “ئەمین جەمال” و و دەرهێنانی “سامح عەبدولعەزیز” و درامای “وش100” چیرۆك و سیناریۆی “ئەحمەد وائل و عمرو ئەلدالی” و دەرهێننانی “كاملە ئەبو زكری” بوو. لەو بارەیەوە پەرلەمانتاری میسری “نبیل بولس” رۆژی 20ی ئایاری رابردوو بە رۆژنامەی “الاخبار”ـی لوبنانی راگەیاند، “ئەو درامایانە هانی توندوتیژی خێزانی و زینای محارم” دەدەن.

هەندێك پێیان وایە لێكەوتە زیانبارەكانی ئەو جۆرە درامایانە، بوونەتە هۆكاری بڵاوبوونەوەی ئەو دیاردەیە لە كۆمەڵگەی عێراقیدا بە گشتی. هەروەها بەردەستبوونی سایتە پۆڕنەكان و نەبوونی سانسۆر لەسەریان هۆكارێكی دیكەی ئەو كێشەیەیە.لەو بارەیەوە، “ئەسعەد عەبدوڵڵا عەبدولعەلی” نووسەری عێراقی لە وتارێكدا پێی وایە “پڕۆژەیەكی گەورە بۆ برەودان بە زینای محارم” لە عێراقدا كاری لەسەر دەكرێت. ئەو جگە لە تۆڕە كۆمەڵایەتییەكان، دراما توركییەكانیش كە دۆبلاژ كراوون بۆ كوردی و عەرەبی و لە كەناڵە ئاسمانی و ناوخۆییەكانی عێراق و هەرێمی كوردستان پەخش دەكرێن، بە تایبەتی درامای “خۆشەویستی قەدەغە”ی توركی، كە تێیدا گەنجێك پەیوەندی سێكسی لەگەڵ مامۆژنی درووست دەكات، بە هۆكاری سەرەكی بڵاوبوونەوەی ئەو دیاردەیە دەزانێت.

لە سایتە پۆڕنە بیانی و عەرەبییەكان، رۆژانە گرتەی سێكسی و وروژێنەری ئەو بەكارهێنەرانە ئەپلۆد دەكرێت، كە لە رێی مۆبایلەوە دزەیان پێدەكرێت، یاخود بەكارهێنەرەكان خۆیان ئەپڵۆدی ئەو سایتانەی دەكەن لە پێناو بڕێك پارەدا، یان بۆ شكاندنی كەسایەتی ئافرەتەكان. هەمان ئەو گرتانە جارێكی دیكە لە تۆڕە كۆمەڵایەتییەكان بڵاودەكرێنەوە، لانیكەم بەكارهێنەران یەكتر لە بوونیان ئاگادار دەكەنەوە. هاوكات رۆژانە چەندین چیرۆكی سێكسی لە بارەی “زینای محارم” بە زمانە جیاجیاكان لە تۆڕە كۆمەڵایەتییەكان برەویان پێدەدرێت.

رێكەوت رەشید محەمەد، پارێزەری یەكێك لەو دۆسیانەی تایبەت بوو بە “زینای محارم” و قوربانییەكان دۆسییەكەیان لە دادگا بردەوە، لە لێدوانێكدا گوتی: “وەك پارێزەر رۆژانە بەرخوردم لەگەڵ ئەو جۆرە دۆسیانە هەیە، كە تاوانەكەیان زینای محارمە”. ئەو گوتیشی: “بە دڵنیاییەوە ئەو تاوانە لە كۆمەڵگەی كوردیدا لە حاڵەت نەماوەتەوە و رووی لە هەڵكشان كردووە، ئەوەش مەترسییەكەی زیاتر كردووە”.

ئاوێزان نوری، چالاكوانی بواری مافەكانی ژن، لە 2018 پەردەی لەسەر تاوانێكی “زینای محارم” لە كەركووك هەڵماڵی. ئەو لە نزیك پەنجەرەیەكی ژوورە دەرگا كڵۆمدراوەكەیان گوێی لە سكاڵای دوو كچی (16 ساڵ) و (26 ساڵ) گرت، كە باوكیان بەوە تۆمەتبار كرد، بەوەی “ماددەی كهولی و حەپی مەستیی دەخوات و پەلاماریان دەدات و زینایان لەگەڵ دەكات”.

رێك وەك ئەوەی لە چیرۆكە سێكسییەكاندا برەوی پێدەدرێت، پاڵەوانی ئەو چیرۆكە هەڵبەستراوانە، وا وێنا دەكرێن، كە چێژ لەو لادانە سێكسییەیان دەبینن و وێنای قوربانییەكان، كە مەحارمی خۆیانن بە “پەری” دەكەن و لە دوای كۆمەڵێك وەسفی ئەندامانی جەستەی مەحارمەكانیان، باسی چێژی دووبارە دەكەن و گرێی چیرۆكەكە دەخەنە كۆتاییەوە و دەڵێن: “ئیتر چەند جاری تر بەیەكەوە خەوتین.. خۆشیمان بینی.. ئەو منی زۆر بە دڵ بوو.. منیش بەڵێنم دا نهێنییەكەی نەدركێنم”، رێك وەك گفتوگۆی ئەو دایكەی لە فیلمێكی فەرەنسیدا، زینا لەگەڵ كوڕێكی خۆی دەكات و پێی دەڵێت: “ئیتر من تۆم لە هەمووان زیاتر خۆش دەوێت و نازی زیاترت پێ دەدەم و هەستی تایبەتترم بۆت هەیە و تۆ جیاوازی لە خوشك و براكانت”.

ئاوێزان نووری چالاكوانیی ژن، بەرپرسی سەنتەری پەناو سەرپەرشتی كەیسەكانی سەنتەری “پەنا” لە شاری كەركووك دەكات، زیاتر لەو بارەیەوە دوا و ئەو بڕوای وایە، هۆكارەكانی بوونی ئەو كێشانە بۆ كێشەی ئابووری وەك نەبوونی ژووری جیا بۆ گەنجانی تازەپێگەیشتوو، لاوازی رۆشنبیری سێكسی، چەپاندنی سێكسی و خراپ بەكارهێنانی تۆڕە كۆمەڵایەتییەكان دەگەڕێتەوە.

لە بارەی دۆسییەی دوو خووشكەكەی كەركووكەوە ئەو زانیاری زیاتری خستەڕوو و گوتی: ئەو كچانە دایكیان بە تۆمەتێك لە هەولێر دەستگیركرابوو، لە چاكسازی گەوران ماوەی حوكمەكەی تەواو دەكرد، باوكیان ئەوەی بە دەرفەت زانیبوو، سەرەتا لەگەڵ كچە (16 ساڵ)ییەكەی زینای كردبوو، كچەكە هەرچەند بە پوورێكی و خوشكە گەورەكەی وتبوو، بەڵام بڕوایان پێ نەكردبوو. باوكەكە بەوەوە نەوەستابوو، دەستدرێژی سێكسی كردبووە سەر كچە گەورەكەی خۆی، تا رادەی بێهۆشبوون ئەشكەنجەی دابوو. كاتێك پەیوەندیان پێوە كردم، چوومە ماڵیان و بینیم دەرگایان لەسەر كڵۆم دراوە و لە پەنجەرەی ژوورەكەیانەوە قسەیان بۆ كردم.

ئاوێزان نووری، لایەنە ئەمنییەكان لەو رووداوە ئاگادار دەكاتەوە و دوای دەستبەسەركردنی، باوكەكە هەموو ئەو تۆمەتانە رەتدەكاتەوە و بە توندی دژیان دەوەستێتەوە.
رێكەوت رەشید وەك پارێزەری ئەو دۆسیەیە گوتی: ئەم دوو كەیسە یەكێكن لەو سەدان حاڵەتانەی زینای مەحارم كە خەریكە لەحاڵەتەوە دەبێتە دیاردەو زۆربەیان بەهۆی حەیاو ئابڕوو پەردەپۆش دەكرێن و رێژەیەكی كەم روو لەدادگاكان دەكرێت بۆ چارەسەركردنیان”.
ئەو گوتیشی: “سەرەتا باوكەكە نكوڵی دەكرد، بەڵام قوربانییەكان دیمەنی دەستدرێژییەكانیان بە مۆبایل تۆمار كردبوو، وەك بەڵگەیەكی بەهێز خستیانە بەردەست دادگا و دادوەر بڕیاریدا بەڵگەكان پیشانی تۆمەتبار بدرێن بۆ ئەوەی چیدیكە نكوڵی لە تاوانەكەی نەكات”.

ئەو پارێزەرە خۆشحاڵ بوو بەوەی قوربانییەكان بێ باك بوون لە بە تاوانبارناسینی باوكیان و نەیاندەویست چیدیكە لە ئاست ئەو تاوانەدا بێدەنگ بن. سەرەنجام دادگا بە گوێرەی بڕگەی چوارەم لە ماددەی (393) لە یاسای سزادانی عێراق بڕیاری لەسێدارەدانی بۆ دەركرد و لە تەمیزیش بڕیارەكە پەسەند كرا. ئەو پرسیاری ئەوەشی وروژاند دەبێت چەند قوربانی دیكەی هاوشێوە لە كۆمەڵگە هەبن و لە ترسی زڕانی ناوبانگ و ئابڕووچوون ناچار بن بێ دەنگی لە ئاست ئەو تاوانانە بكەن كە دەرهەقیان دەكرێت.

ئازاد جەلال، توێژەری كۆمەڵایەتی و سەرنووسەری گۆڤاری “خود” كە گۆڤارێكی تایبەت بە رۆشنبیری سێكسییە، پێی وایە ئەو كەسانەی بە منداڵی دەستدرێژی سێكسیان كراوەتە سەر، كاتێك گەورە دەبن، گرێیەكی دەروونیان بۆ درووست دەبێت و دەیانەوێت لەو رێگەیەوە خۆیان لەو گرێیە رزگار بكەن. ئەو ئافرەتانەش كە لە لایەن مەحرەمەكانیانەوە دەستدرێژیان دەكرێتە سەر و دایدەپۆشن، تووشی خەمۆكی دەبن. ئەو پێیشی وایە، ئەو جۆرە تاوانانە پەیوەندیان بە ئاستی هۆشیاری خێزانیی كوردەوە هەیە. ژینگەی خێزانی كوردی لە رابردوودا لەبار نەبووە بۆ بەرهەمهێنانی نەوەیەكی تەندروست لە رووی پەروەردەی سێكسییەوە.

ئەوەی جاران لە ژێر پەردەی ئابڕوو و شەرم دەشاردرایەوە، رەنگە ئێستا رێگەیەكی هەبێت بۆ دەرخستن و بڵاوبوونەوە، ئەوەی بەكارهێنانی تۆڕەكانی پەیوەندی و سۆشیال میدیایە، كە بەكارهێنەر دەتوانێت بە ناوی خوازراو ئەو چیرۆكانەی ناخی و ئەو خەیاڵە سێكسیانەی هەیەتی بیانخاتەڕوو و لەوەوە زەمینە خۆش بكات بۆ ئەوەی زۆرترین كەس لاسایی بكەنەوە و لانیكەم ئەو لادانە سێكسییە بە رووداوێكی ئاسایی و سەرچاوەیەك بۆ خۆخاڵیكردنەوە ببینن و دوای ئەنجامدانیشی هەست بە تاوان نەكەن. وەك ئەوەی ئەو توێژەرە كۆمەڵایەتییە ئاماژەی پێكرد.